એચ. આર. શાહ મહિલા આર્ટ્સ એન્ડ કોમર્સ કોલેજ, નવસારીના હોમ સાયન્સ વિભાગ દ્વારા 'રાષ્ટ્રીય પોષણ માહ'ની ઉજવણી નિમિત્તે વાનગી સ્પર્ધાનું આયોજન કરવામાં આવ્યું  જેમાં ૩૫ વિદ્યાર્થિઓએ  ઉત્સાહભેર ભાગ લીધો.
​નવસારી (૧૦ સપ્ટેમ્બર ૨૦૨૬):
એચ. આર. શાહ મહિલા આર્ટ્સ એન્ડ કોમર્સ કોલેજના ગૃહવિજ્ઞાન (Home Science) વિભાગ દ્વારા 'રાષ્ટ્રીય પોષણ માહ' (National Nutrition Month) ની ઉજવણીના ભાગરૂપે તા. ૧૦ સપ્ટેમ્બર ૨૦૨૬ના રોજ એક વિશેષ વાનગી સ્પર્ધા (Recipe Competition) નું ભવ્ય આયોજન કરવામાં આવ્યું હતું. વિદ્યાર્થિઓમાં સંતુલિત આહારનું મહત્વ, પોષણ અંગે જાગૃતિ આવે અને તેમની રસોઈકળા તેમજ સર્જનાત્મકતા ખીલે તે હેતુથી આ કાર્યક્રમ યોજાયો હતો.
​આ સ્પર્ધામાં કોલેજની કુલ ૩૫ જેટલી વિદ્યાર્થિનીઓએ ખૂબ જ ઉત્સાહપૂર્વક ભાગ લીધો હતો. પોષણ માહના ભાગરૂપે વિદ્યાર્થિનીઓએ પોષક તત્ત્વોથી ભરપૂર, સ્વાદિષ્ટ અને આરોગ્યપ્રદ એવી પરંપરાગત તેમજ આધુનિક શૈલીની વિવિધ વાનગીઓ પ્રસ્તુત કરી હતી. રોજિંદા આહારમાં પૌષ્ટિકતા કેવી રીતે વધારી શકાય તેનું ઉત્તમ પ્રદર્શન સ્પર્ધકો દ્વારા કરવામાં આવ્યું હતું.
​આ સ્પર્ધામાં નિર્ણાયક (Judges) તરીકે ઉપાચાર્ય ડૉ. ગિરીશ વાઘેલા તથા ડૉ. હેમલતા પટેલએ સેવા આપી હતી. તેમણે વાનગીઓની ગુણવત્તા, પોષક મૂલ્ય, સ્વાદ અને આકર્ષક પ્રસ્તુતિના આધારે ઝીણવટપૂર્વક મૂલ્યાંકન કરીને વિજેતાઓની પસંદગી કરી હતી.
​આ પ્રસંગે સંસ્થાના ટ્રસ્ટી શ્રી અશોક શાહ, આચાર્યશ્રી ડૉ. જિગ્નેશ જે. પરમાર, હોમ સાયન્સ વિભાગના અધ્યાપકગણ તેમજ સમગ્ર સ્ટાફે ઉપસ્થિત રહી વિદ્યાર્થિનીઓની મહેનત અને કૌશલ્યને બિરદાવ્યા હતા. આચાર્યશ્રીએ જણાવ્યું હતું કે, પોષણ માહ અંતર્ગત આવી પ્રવૃત્તિઓથી વિદ્યાર્થિનીઓ માત્ર શૈક્ષણિક રીતે જ નહીં પરંતુ આરોગ્ય અને સંતુલિત જીવનશૈલીની દ્રષ્ટિએ પણ જાગૃત બને છે.​સમગ્ર સ્પર્ધામાં ઉત્કૃષ્ટ પ્રદર્શન કરનાર પ્રથમ ક્રમાંક  પીપરોતર માનસી મુરૂભાઈ બીજા ક્રમાંક પટેલ સાનિધ્ય કૌશિકભાઈ  અને ત્રીજા ક્રમાંક શેખ રોનકપરવીન વિજેતાઓને અભિનંદન પાઠવી સન્માનિત કરવામાં આવ્યા હતા. કોલેજ પરિવાર દ્વારા તમામ સહભાગી વિદ્યાર્થિનીઓને તેમના ઉજ્જવળ ભવિષ્ય માટે શુભેચ્છાઓ પાઠવવામાં આવી હતી.